Méi wéi 50 Millioune Leit aus iwwer 150 Länner verfollegen all Joers de musikalesche Start an dat neit Joer mam Wiener Neijoerschconcert aus dem gëllene Sall vum Musikverein. Nodeems den 1. Januar 2026 nom Concert dann och de Nofollger um Pult bekannt gi gouf, steet elo och den offizielle Programm vum Concert fest. Spille wäerten traditionell d'Wiener Philharmoniker, dëst Joer ënner der Leedung vum 49 Joer alen Dirigent an Neijoerschconcerts-Debutant Tugan Sokhiev. Hien ass Chefdirigent vum Orchestre de la Suisse Romande an zukünftege Museksdirekter ab 2028/29 vum Sinfonieorchester zu Tokio. Dës nei Tâche gouf eréischt virun e puer Deeg bekannt ginn. Ee flotte Surplus vun dësem Concert ass nees d'Presenz vun engem Chouer beim Wiener Neijoerschconcert. Fir déi zweete Kéier stinn d'Wiener Chormädchen op der grousser Bün. Dobäi kommen Dänzer:innen vum Wiener Staatsballet. Musikalesch geet et wéi gewinnt an d'Wierker, jo scho Klassiker vum Josef Strauss a Johann Strauss. E puer Wierker sinn iwwerdeems och fir eng éischte Kéier am Kader vum Wiener Neijoerschconcert ze héieren. Dozou zielen dem Philippe Fahrbach Jr. säin "Storchschnäbel", Op. 149, dem Eduard Strauss seng Polka "Saat und Ernte", Op. 159. Nodeems een zënter zwee Joer och aktiv dorop oppasst, Komponistinnen ze programméieren, huet een sech dës Kéier fir d'Cécile Cheminade an hir Ballets-Aire aus "Callirhoë", Op. 37 entscheet. D'Joer 2027 ass iwwregens d'Josef-Strauss-Joer an der Klassik, deen nämlech 1827 virun 200 Joer op d'Welt kënnt. Den Opus iwwerdréit den Neijoerschconcert 2027 och live op der Antenn op DAB+, iwwer d'Opus 100,7 App an de Webstream ënner www.opus.radio. De komplette Programm kënnt dir ënnert www.wienerphilharmoniker.at noliesen.