Den Antoine-Joseph Sax, besser bekannt als Adolphe Sax, kënnt viru genee 212 Joer an der Belsch zu Dinant op d’Welt. De Beruff vum Instrumentebauer gëtt him an d’Kannerbett geluecht, säi Papp ass nämlech selwer Proprietär vun enger Blosinstrumentefabrik. Zu Bréissel mécht de jonken Adolphe Sax seng Etüden un der Musekschoul, hien ass een ausseruerdentlecht Talent. Hien entscheet sech a jonkem Alter Klarinett ze léieren. Mee séier stéiert de Museker eppes u sengem Instrument. Hien tüftelt doheem un engem neie System fir d’Bassklarinett, verbessert d’Proportiounen an d’Spillbarkeet vum Instrument, d’Klappemechanik ass net esou wéi en sech et virstellt an och den Triichter muss senger Meenung no no uewe gekrëmmt sinn. Eng Iddi, déi en ëmsetzt an och offiziell patentéiere léisst.
An de Knuet ass geplatzt. Hien entwéckelt och aner Instrumenter, tauscht hei an do eppes aus an huet op eemol d’Iddi vun engem Instrument, dat sech och perfekt fir Optrëtter dobaussen eegent. Seng Iddi: “Een Instrument, dat am Charakter der Stëmm vu Sträichinstrumenter nokënnt, mee mat méi Kraaft an Intensitéit”, sou den Adolphe Sax a sengem Patent, datéiert op den 21 . Mäerz 1846.
An tatsächlech bréngt den Adolphe Sax et fäerdeg een Instrument ze bauen, dat mol kräfteg wéi Blechblosinstrumenter, mol douce an onschëlleg klénge kann. Hie wëll een Instrument, dat souwuel an enger Militärmusek, wéi och am Sinfonieorchester funktionéiert an net esou séier verstëmmt. An et klappt! Hie selwer hätt sech wuel net virstelle kënnen, datt säin Instrument souguer ganz Genrë präägt wéi den Jazz oder Swing.
Mee och bekannte lokal an international Museker si begeeschtert. Den Hector Berlioz schreift direkt Wierker fir dëst neit Instrument.
Mee obwuel den Adolphe Sax mat senger Erfindung ufanks risege Succès huet, kritt hien duerch Revolutiounen an d’Enn vum zweete Keeserräich a Frankräich, wéi och vu Konkurrente vill Steng an d’Féiss geluecht. Souguer d’Aarbechter, an den Adolphe Sax hat der zu Spëtzenzäiten iwwer 100 Stéck, verrode Betribsgeheimnisser. 1870, no enger Zäit vu ville Geriichtsprozesser a feelenden Opträg, muss den Adolphe Sax Faillite deklaréieren.
Ronn 50 Joer duerno ass de Saxophon awer nees un der Spëtzt. Duerch afroamerikanesch Museker fënnt d’Instrument eng Plaz am Swing, am Jazz, a Big-Bands a spéiderhin der Pop-Musek. Charlie Parker, Coleman Hawkins, John Coltrane, Lester Young, Candy Dulfer: Bis haut Nimm, déi vum Sopranino bis zum Kontrabasssaxofon haut nach an de Playlisten erëmzefanne sinn.
