De San Francisco Symphony huet gëschter an engem Communiqué den Doud vum Dirigent Michael Tilson Thomas annoncéiert. No engem aggressiven Tumeur am Gehier, géint deen hien zanter 2021 gekämpft huet, ass den Dirigent mat 81 Joer gestuerwen – an dat doheem, entouréiert vu senger Famill a senge Kolleegen. Trotz senger Krankheet war de Michael Tilson Thomas, och MTT genannt, weiderhin aktiv an der Welt vun der Musek.
Den MTT hat am Alter vun 29 Joer beim San Francisco Symphony ugefaangen a war an deenen 52 Joren, wou hie beim Orchester matgewierkt huet, bei iwwer 1.800 Concerten dobäi. Vun 1995-2020 huet hien den Orchester dirigéiert an huet ënner anerem de Label vum Orchester matgegrënnt. De Label SFS Media huet zanterhier eng Rei u Grammy Awards fir seng Opname gewonnen.
Dem Dirigent säi leschte Concert war am Abrëll 2025, fir säin 80. Gebuertsdag. Um Programm stoungen d'”Feste Romane” vum Respighi, esou wéi “The Young Person’s Guide to the Orchestra” vum Benjamin Britten, e Stéck, dat den Thomas 1995 bei sengem éischte Gala mam Orchester dirigéiert hat.
De Michael Tilson Thomas bleift senge Kolleegen als aussergewéinlechen Artist an Erënnerung, deen en Deel vum Kulturliewen zu San Francisco an als Mënsch immens léif a generéis war.
Wéi 2025 kloer war, datt seng Krankheet onheelbar wier, huet de Michael Tilson Thomas Follgendes gesot: "A 'coda' is a musical element at the end of a composition that brings the whole piece to a conclusion. A coda can vary greatly in length. My life’s coda is generous and rich."
