D'Proms vun der BBC si wuel eng vun de bekanntste weltwäite Concertsreien iwwer de Summer. Zu London a virun allem an der prestigiéiser Royal Albert Hall kann een dëst Joer iwwer 8 Woche laang eng Rei Highlighten erliewen. D'BBC Proms si vum 17. Juli bis den 12. September 2026.
Insgesamt waarden dëst Joer 86 Veranstaltungen op de Public, dee mam Programm vun der First Night of the Proms, also dem Erëffnungsconcert de 17. Juli, direkt mam Theema "Amerika" a Kontakt kënnt. D'BBC Singers, hire Sinfonieorchester a Chouer ënner der Dalia Stastevska presentéiere Wierker vu Gershwin, Copland an och Ravel zesumme mam Yunchan Lim um Piano an dem Tenor Thomas Atkins. Freeën dierf ee sech dann och op eng Uropféierung.
De roude Fuedem vun dësen BBC Proms ass kloer den 250. Jubiläum vun der US-Onofhängegkeetserklärung. An deem Kader wäerten de Gustavo Dudamel a säi Los Angeles Philharmonic no knapp 25 Joer fir direkt zwou Proms zeréck op London kommen! Grad esou sinn den Debut vum MET Orchestra aus New York ënner dem Yannick Nézet-Séguin an déi amerikanesch Dirigentin Marin Alsop op Besuch.
Mee och den 90. Gebuertsdag vum Steve Reich steet am Mëttelpunkt vun de Proms 2026. Hie kritt direkt zwou Proms programméiert.
Weider Highlighte si fir eis dann och d'Optrëtter vun de Pianistinne Martha Argerich an d'Yuja Wang, wéi och de Berliner Philharmoniker ënner dem Kiril Petrenko mat den “Enigma Variatioune” vum Edward Elgar, wéi der 4. Sinfonie vum Tschaikowsky.
