Wéi et heescht goufen d‘Fluch-Operatioune géint 21:38 Auer gëschter Owend suspendéiert: Virdru waren Dronen an der direkter Ëmgéigend vum Flughafe gesi ginn.
Eng knapp Stonn méi spéit, um 22:30 Auee, huet de Flughafen de Betrib nees komplett opgeholl. Weider Informatiounen iwwer dësen neie Virfall mat Drone ginn et den Ament net.
Findel hat schonn e Freideg mussen zougemaach ginn
De leschte Freideg war de Fluchbetrib um Findel scho wéinst Dronen temporär gespaart ginn, an 19 Flich waren ëmgeleet ginn. D‘Dronen-Evaluatiouns-Cellule koum an Tëschenzäit e puer Mol zesummen. Duerno gouf matgedeelt, datt Lëtzebuerg d‘Mëttel verstäerkt hätt, fir Dronen ze detektéieren an de Loftraum ze iwwerwaachen.
Weider Informatiounen iwwer déi Drone-Virfäll goufen d‘Regierung an d‘Autoritéite bis elo net – si kéinten aus Sécherheetsgrënn kéng Detailer ginn, huet et geheescht.
D‘Dronen-Evaluatiouns-Cellule hat gëschter Mëtteg no enger weiderer Sëtzung nach matgedeelt, et géif keng nei Informatioune ginn, an de Public géif direkt informéiert ginn, wann et eng pertinent Entwécklung géif ginn.
