De Mozart soll iwwer sech selwer gesot hunn, hie kéint guer net gleewen, datt a sengem klenge Kapp esou vill Grousses géing stiechen. Seng 10. Serenade fir Bléiserensembel spigelt de grousse Räichtum vu sengen Iddien erëm – mol feierlech, mol eescht, mol lëschteg, mol ganz verdreemt. An engem Programmheft vum Joer 1784 gouf dëst Stéck ugekënnegt als "eine große blasende Musik von ganz besonderer Art von der Composition des Hrn. Mozart".
Déi Serenade kënnt Dir an dësem Concert lauschteren, direkt no engem Arrangement vum Bach sengem 3. Brandenburgesche Concert. D’Bléiser vum RTV Slovenia Symphony Orchestra huelen Iech mat op eng Rees duerch verschidde Klangwelten.
Dëse Concert gouf den 11. Januar 2026 an der sloweenescher Philharmonie zu Ljubljana opgeholl. An dës Opnam ass nach bis den 11. August an der Opus-Mediathéik disponibel.
Programm:
Johann Sebastian Bach (1685-1750): 3. Brandenburgesche Concert a Sol Majeur, BWV 1048
Wolfgang Amadeus Mozart (1756-1791) : 10. Serenade a Si bémol Majeur, KV 361 ('Gran Partita')
Interpreten:
Bléiser vum RTV Slovenia Symphony Orchestra
Presentéiert vum Sophie Urhausen
