Den Numm ass Programm: dëse Concert steet ganz am Zeeche vun den emotionellen Héichten an Déifte vun der Musek vum 19. Joerhonnert. Vu lëschtegen Duerffester bis zu engem lyreschen Cello-Duo ass hei alles dobäi.
Den Ufank vum Programm maachen d'Lëtzebuerger Philharmoniker ënner der Leedung vum Renaud Capuçon. Si spillen dem Johannes Brahms seng “Tragesch Ouverture” aus dem Joer 1880, déi als emotionellt Géigestéck zu senger “Akademescher Festouverture” geschriwwe gouf. Duerno steet ee Wierk um Programm, dat laang a Vergiessenheet gerode war - dem Robert Schumann säin Cellosconcerto op.129. D'Solistin Julia Hagen iwwerzeegt net nëmme mat hirer gelongener Interpretatioun vun dësem Wierk, mee iwwerrascht och mat enger Zugab, déi si zesumme mat engem Cellist aus dem Orchester spillt.
Als Ofschloss vun dësem Concert héiere mir dem Antonín Dvořák seng 8. Sinfonie. Typesch fir den tschechesche Komponist gräift dëst Wierk Folksmelodien aus senger Heemecht op, mee den Dvořák weist hei och eng besonnesch Experimentéierfreed, wat de Charakter an den Opbau vum Stéck ugeet. Doduerch entsteet ee villschichtegt a kontrasträicht Meeschterwierk.
Opgeholl gouf dëse Concert de 27. Februar 2026 an der Philharmonie zu Lëtzebuerg an Dir kënnt en nach bis de 6. Mee 2026 an der Mediathéik vum Opus nolauschteren.
Programm:
Johannes Brahms (1833-1897): Tragische Ouvertüre, op.81
Robert Schumann (1810-1856): Concerto fir Cello a La Mineur, op.129
Antonín Dvořák (1841-1904): Sinfonie Nr. 8 a Sol Majeur, op.88
Interpreten:
Julia Hagen, Cello
Lëtzebuerger Philharmoniker
Renaud Capuçon, Direktioun
