Den Dirigent, Trompettist an Arrangeur Gast Waltzing gëtt dëst Joer Siwwenzeg a fir dat richteg ze feieren, luet hien haut den Owend, 13. Mee um hallwer 8 lauter Kolleegen op e grousse Concert an der Philharmonie an. Um Programm sti Wierker, déi säi Liewenswee gepräägt hunn an Deel vun enger beandrockender Carrière sinn. Ënner anerem huet hien zesumme mat der Sängerin Angelique Kidjo an de Lëtzebuerger Philharmoniker e Grammy-Award gewonnen.
Mir hunn de Gast Waltzing kuerz no der Generalprouf a senger Loge getraff, hien huet eis ënnert anerem verrode firwat hie säi Gebuertsdag 3 Méint ze fréi feiert, wien alles op der Bün ze erwaarden ass a firwat hie grad mat deene Leit dee ronne Gebuertsdag feiere wollt.
