Zu Rafah wieren op d'mannst 13 Leit ëm d‘Liewe komm nodeems dräi Haiser bombardéiert goufen, sote palästinensesch Dokteren. Vun israeelescher Säit gëtt et nach keng Confirmatioun vun där presuméierter Attack.
D‘Verhandlungen iwwer eng Wafferou ginn haut an der ägyptescher Haaptstad Kairo virun. Déi militant islamistesch Hamas soll sech haut zu der leschter Propos vun Israel äusseren. Israel hat virgëschter gesot, déi geplangte Buedemoffensiv op Rafah géif no hanne verréckelt ginn ënnert der Konditioun, datt d‘Hamas weider Geisele fräi léisst.
Diskussiounen och a Saudi-Arabien
Iwwer eng Wafferou an d‘Liberatioun vun de Geisele gëtt haut och a Saudi-Arabien diskutéiert. An der Haaptstad Riad ginn ënner anerem den amerikaneschen Ausseminister Antony Blinken an déi däitsch Ausseministerin Annalena Baerbock erwaart.
World Central Kitchen hëlt Aarbecht nees op
An der Gazasträif huet déi amerikanesch Hëllefsorganisatioun „World Central Kitchen“ hir Aarbecht nees opgeholl. Si huet matgedeelt, datt 276 Camione prett stéinge fir bal 8 Millioune Moolzechten an de palästinenseschen Territoire ze bréngen.
World Central Kitchen hat am Abrëll all Aktivitéiten an der Gazasträif gestoppt nodeems 7 vun hire Mataarbechter bei enger israeelescher Loftattack ëm d‘Liewe komm waren.