Enn leschter Woch gouf ugekënnegt, wéi eng 12 Radioen op den éischte Lëtzebuerger DAB+-Multiplex kommen, wéi eng Programmer also spéitstens vun Enn dës Joers un iwwer de Wee vun där digitaler terrestrescher Technologie wäerten ausgestraalt ginn. (De radio 100,7 an eise Klassiksender opus 100,7 gehéieren natierlech dozou.)
Wat fir eis hei am Land nei gëtt, ass fir d’Schwäizer eppes Albekanntes. D’Schwäiz gehéiert zu de Pionéier am Beräich vum Digital Audio Broadcasting (DAB). Viru 25 Joer sinn do schonn déi éischt Versich gemaach ginn, zënter dësem Joer kënnen déi ëffentlech-rechtlech Radioen nëmmen nach iwwer dee Wee gelauschtert ginn; si hunn hir Diffusioun iwwer UKW agestallt. Mee firwat ass den DAB iwwerhaapt néideg an engem Moment, wou ëmmer méi Leit de Radio iwwer Internet lauschteren? Froen un de Marco Derighetti, Direkter vun den Operatioune bei der Schweizerischen Radio- und Fernsehgesellschaft.
