Den 8. Juni 2024 stoungen an der Kölner Philharmonie ënner anerem Wierker iwwer d’Bild vun der Fra am Mëttelpunkt.
No enger Introduktioun duerch dem Richard Strauss säin “Don Juan”, bei deem d’Leidenschaft an d’Begieren no de Fraen thematiséiert gëtt, ass et dem Max Bruch säin éischte Geie-Concerto, dee vun der koreanescher Violonistin Bomsori Kim an dem WDR Sinfonieorchesrer ënner der Leedung vum Cristian Mǎcelaru ze héiere war.
Duerno stoung dann déi franséisch Komponistin Mélanie Bonis am Mëttelpunkt. Si huet hiert Liewe laang ënner dem Pseudonym Mel Bonis publizéiert. Weider goung et mat dem Strauss senger drëtter sinfonescher Dichtung “Tod und Verklärung” an zum Ofschloss dem Richard Wagner seng Ouvertür aus der Oper “Tannhäuser”.
Firwat d’Haaptwierk vum Concert, dem Max Bruch säin éischte Geie-Concerto, gläichzäiteg Fluch a Seege fir de Komponist war, verréit Iech, ënner anerem, de Jeremy Ney, deen duerch dëse Concertsprogramm féiert.
Dëse Concert kënnt Dir bis den 29. Januar 2025 zu all Moment an der Mediathéik vum opus 100,7 nolauschteren.
Programm:
• Richard Strauss (1864-1949): Don Juan, op.20
• Max Bruch (1838-1920): Geie Concerto Nr. 1 a Sol mineur, op.26
• Grażyna Bacewicz (1909-1969): Polish Caprice (Encore)
• Mel Bonis (1857-1938): Salomé aus “Trois femmes de légende”, op.100/2
• Richard Strauss: Tod und Verklärung, op.24
• Richard Wagner (1813-1883): Ouverture aus “Tannhäuser”
Interpreten:
• Bomsori Kim (Gei)
• WDR Sinfonieorchester
• Cristian Mǎcelaru (Dirigent)