Frankräich ass am "Etat d'Urgence" no der Attentatsserie zu Paräis mat op d'mannst 127 Doudesaffer. An enger Declaratioun de Moien géint 11 Auer huet de franséische President François Hollande vun engem "acte de guerre" geschwat an dräi Deeg Staatstrauer annoncéiert.
De Jean Asselborn huet nach dës Woch mam franséische President iwwert de Risiko vun Attacken a Frankräich geschwat. De Lëtzebuerger Ausseminister mécht een Appel fir Solidaritéit mat Frankräich. Zur Declaratioun vum François Hollande, datt et sech ëm ee Krichs-Akt handelt, seet de Jean Asselborn: "Ech mengen, dass hien domadder Recht huet. Ech géif just soen, dass mir an der Virgoensweis - an ech mengen do ass och Frankräich dobäi - net déi nämmlecht Fehler dierfe maache wéi 2003 an de Krich géint den Terror declenchéieren an iergendee Land attackéieren. Dat wäert och net geschéien, do sinn ech mir sécher." D'Konflikter am Mëttleren Oste vun haut hätten hiren Ursprong am Krich vun 2003 am Irak.
De Premier Xavier Bettel huet fir de Mëtteg um véier Auer een aussergewéinleche Regierungsrot aberuff. Schonn de Moie sinn hei am Land d’Spezialisten zesummen, déi sech ëm d’Sécherheet vum Land këmmeren, esou de Regierungschef. D'Experte sollen d’Situatioun analyséieren. D’Attentater si mat de schlëmmste Wieder ze veruerteelen, huet de Xavier Bettel betount. Et misst een elo zesummenhale fir esou Akten an d'Terroristen ze bekämpfen, mat alle Mëttel déi zur Verfügung stinn. Déi franséisch an déi europäesch Grondwäerter misste verdeedegt ginn.
Eise Panorama-Spezial mat weidere Reaktiounen an Aschätzungen: