Radioen

On air

Notturno  |  Jean-Philippe Rameau - Nouvelles Suites de Pièces de Clavecin, Suite a Sol Mineur, RCT 6, IV. La poule - Cathy Krier (Piano)

play_arrow Live
opus

/ D’Welt ass net op weider Pandemie virbereet

Gesondheet

D’Welt ass net op weider Pandemie virbereet

Trotz der COVID-Pandemie bléift d’Welt weiderhi schlecht op Gesondheets-Krise virbereet.  Dat konstatéiert den onofhängegen Observatoire fir Gesondheets- a Krisepreventioun an engem Rapport. Den Observatoire mat Sëtz zu Genf soll d’Virbereedungen an der Welt analyséieren a Recommandatioune maachen.

auto_stories

2 min

headphones

2 min

play_arrow
Foto: Bigstock / WESTOCK.IN

Wärend der COVID-Pandemie hätten d’Länner sou Munches zu Stand bruet, mee verschidde Länner hätten hir Mesure fir op esou Krisen ze reagéiere schonn erëm zeréck gedréint. An anere Länner géif et guer keng Fortschrëtter ginn.

Iwwerwaachung misst verbessert ginn

Den Observatoire ass viru fënnef Joer gegrënnt ginn, ënner anerem fir op d’Ebola Epidemie a Westafrika ze reagéieren. Elo schléit e vir, datt d’Länner hir Iwwerwaachung verbessere missten, fir d’Krisepreventioun weltwäit ze verbesseren, sou datt néi Krankheeten éischter géingen entdeckt ginn.

Fuerschung dierf sech net op eenzel wéineg Länner konzentréieren

Méi aarm Länner bräichten eng finanziell Ënnerstëtzung, fir kënnen déi neidesch Ressourcë bereet ze stellen. E geplangte Fonds vu ronn 10 Milliarden Euro fir d’Pandemiepreventioun misst dréngend finanzéiert ginn, sou den Observatoire fir Gesondheets- a Krisenpreventioun.

Ausserdeem dierft d’Fuerschung an d’Entwécklung vun néie Medikamenter net nëmmen op eenzel wéineg Länner konzentréiert sinn.

Vertrauen opbauen an Zesummenaarbecht fërderen

Den Observatoire mécht och drop opmierksam, datt d’Mësstrauen ënnert de Länner an déi geopolitesch Spannungen, d’Welt dovun ofhalen zesumme Léisunge fir eng Verbesserung ze fannen.

Et gëtt gehofft, datt mat de Recommandatioune vum Observatoire en transparenten a faire System zur Pandemie-Preventioun geschaaft gëtt, an domat méi Vertraue kéint opgebaut ginn, wat d’Zesummenaarbecht kéint fërderen.

Lauschterenplay_arrow

Aktualitéit
Europa
Gesondheet
International